Tres tarefas repetitivas que a IA pode quitarche de enriba

Cando se fala de IA, o habitual é pensar en robots ou en cousas moi lonxe dun comercio, un obrador ou unha empresa de reformas. Na práctica, onde máis axuda é en tarefas pequenas que se repiten cada semana e que ocupan tempo sen dar gusto a ninguén.

1. Pasar o que contas en voz a un documento ordenado

Moita xente de oficio explica o traballo mellor falando que escribindo. Unha IA pode transformar «quitar o azulexo do baño, poñer uns vinte e catro metros novos e cambiar o prato de ducha» en conceptos, cantidades e un borrador de presuposto. Ti revisas, corriges o que haxa que corrixir e envías.

É a idea da nosa demo de presupostos por voz, que aínda estamos preparando: non pretende decidir os prezos por ti, só aforrarche o traballo de teclear e maquetar.

2. Responder as mesmas preguntas

Horarios, como chegar, se aceptades encargos, cando tedes un produto. Se as mesmas dez preguntas chegan por WhatsApp ou correo, un borrador de resposta preparado por IA (que ti aprobas) quita moito vaivén. O truco é que as respostas saian do que ti lle deches, non do que a IA se invente.

3. Primeiros borradores de textos

Unha publicación para redes, a descrición dun servizo ou o texto dunha oferta. A IA axuda a ter un primeiro borrador e a probar tons distintos. Non lle deixes publicar soa: os textos sen revisar adoitan soar xenéricos e, ás veces, afirman cousas que non son certas do teu negocio.

Onde non convén fiarse

• Prezos, prazos e datos legais. Ten que confirmalos unha persoa.
• Calquera cousa que mande ao cliente sen que a vexas.
• Datos persoais de clientes en ferramentas gratuítas das que non sabes onde gardan a información.

Por onde empezar

Escolle a tarefa que máis che molesta e que menos risco ten se sae mal. Proba durante unhas semanas e fíxate en canto tempo che aforra de verdade. Se queres, cóntanos cal é e buscamos o atallo.